فيروس الفرحه

#فيروس_الفرحة. عارف انت ايه اسرع وسيلة للفرحة ؟! .. هي فرحها تشوفها في عيون اللي حواليك بس تكون انت سببها ..ع الاقل ممكن تكون بسمة بتبتسمها في وش حد يخليه ينسى همه ولو مجرد لحظة ... ابدأها بيك وخليك انت #فيروس_الفرحه .. فيروس هيتخلل كل خلايا الحزن اللي ساكنه الوجوه الكئيبة حواليك .. خليك عدوى السعادة .. فرحهم تفرح ... فرح مامتك وقولها تسلم ايدك حتى لو طابخه عدس ... فرح اختك الصغيرة وهاتلها وردة او حتى جرجيرة من التلاجة وفرحها وهزر معاها... قابل صحابك اقلبها عليهم فوضى ضحك ... انت ادها... روح لصاحب فرقت بينكم الايام ورجع الذكريات .... لو شفت طفل هزر معاه خليه يعكس ضحكتك في عينيه البريئة .. حاجات بسيطة بس بتفرق حاجات سهل بس هتنعكس عليك بالفرح ... ببساطة جربها

تخيل شخص ماشي في مكان طبيعي جدا وفجأة

#تخيل_بنفسك تخيل شخص ماشي في مكان طبيعي جدا وفجأة .. رجله فلتت ووقع في حفرة ..الشخص دا محتاج حد يساعده .. حد ينقذه .. حد .. اي حد يرميله حبل يخرجه من المكان دا .. تخيل لو جه اخييرا الحد اللي هيساعده وبالفعل رمى له حبل يخرجه من ازمته ... تخيل لو اخد الحبل دا ولفه حوالين رقبته !! انت هتقول عن الشخص دا ايه ؟! .. مجنون .. مش طبيعي !! ... طيب تعرف ان الشخص دا ممكن يكون انت ... ماتستغربش .. تعرف لما تقع في ورطة او مشكلة وتتعقد في حياتك وتتغير للأسوأ .. تعرف لما تغلط غلطه فتيأس وتحول حياتك كلها لغلط ... اهوو دا بالظبط الشخص الي وقع في حفرة وبدل مايخرج نفسه منها قضى على نفسه فيها .. ارجع لربك اي يكن مشكلتك .. كبيرة .. صعبة.. مافيش ارحم من ربنا .. ادعي وسمعه كلمه ياااارب .. صدقني تفرق ... فكر واعقلها..

#انقذ_ضميرك عارف يعني ايه ضمير ؟!

#انقذ_ضميرك عارف يعني ايه ضمير ؟! يعني صوت حي جواك بيأنبك لو غلطت بيوجعك لو قصرت وكمان بيشجعك ع الصح .. طول ما انت ضميرك صاحي .. لسه بيفكرك بذنبك .. لسه عاوزك تتغير .. لسه مش عارف تخرسه عشان ترتاح اعرف ان لسه فيك امل ... لسه فيك جزء صالح محتاج تهتم بيه علشان يكبر ويكون دا هو انت .. انت اصلك طيب .. برئ .. صالح ماتضيعش طبيعتك اللي ربنا فطرك عليها .. حتى لو حصل وضليت الطريق وبعدت عنها شويه بقى او كتير .. بس لازم في الاخر ترجع .. الحق نفسك طالما لسه بتتعب لما بتغلط .. طالما لسه بتندم لما بتذنب .. لسه قلبك حي وضميرك صاحي ... الحق نفسك .. الهاشتاجات هي العنوان

#امسك_اعصابك

#امسك_اعصابك
لو حد جه خبطك خبطة شديدة وانت معدي .. لو صاحبتك وقعت حاجة على هدومك وبوظتها ... لو حد من اخواتك ضيع ورق الشغل ..
مواقف كتير هتعصبك لو حصلتلك وممكن اللي ادامك يعذرك لو طلعت غضبك عليه حتى لو اعتذرلك بس انت كدا استفدت ايه ؟!
هو اكيد مش قاصد وبتصرفك دا هتضايقه اكتر وتحسسه بالذنب ..ليه ماتقبلش اسفه بنظرة تفهم ؟! ليه ماتعديهاش ؟ ماهي لو حسبتها مش مستاهله .. طب اقولك حاجة عن رسولنا الكريم ( من كظم غيظا وهو يقدر على انفاذه ملأ الله قلبه أمنا وإيمانا ) .. تخيل انت مسكت اعصابك في موقف ربنا عوضلك عنه ايه .. امن وايمان شايف ان المقابل دا قليل في سبيل كبت غضبك اللي لو خرجته هتندم عليه بعدين  ؟ .. ولعلمك كل ماكبر الموقف وكان صعب تسيطر على غضبك كل ماكبر المقابل اللي ربنا وعدك بيه ...
ها ... لسه هتتعصب ؟! ..