غاوي_فرحه في وسط الزحمة

• #غاوي_فرحه في وسط الزحمة في بنت بتحاول تثبت لنفسها انها هتعرف تعدي لوحدها من غير ماحد يمسك ايدها .. مغامرة ... في ولد بيسابق اصحابه وبسمته حاضنه ملامحه حالفه لتسبقهم كلهم .. تحدي .. . في واحد بيحاول يعدي خطيبته وبيحوط عليها من غير ما ايده تلمسها ..حب .... في بنت اتلككت ومسكت ايد جوزها علشان تحسسه انها محتاجه له ... احتياج .. . في شاب رجعت بيه ذكرياته مع مراته وحضن ايديها وعداها .. امان ... زحمة آه زحمة بس اكيد حد بيها فرحان ... ماتخليش حاجة تعدي عليك الا لما ترسم بسمة ع شفايفك ... افرح بقى دا الدنيا يومين ...
• 

رسالة ... لا للتحرش ...

عن #التحرش التحرش دا هو اقذر حاجة ممكن تتعرضلها البنت ... ممكن تكون ماشية لوحدها في حالها او حتى مع اصحابها ..اي يكن لبسها..اي يكن الوقت... اي يكن عمرها او عمر المتحرش نفسه .. التحرش يقدر يحول وشها من ضحكة وهدوء يحوله للون اصفر مخطوف وعينين مدمعة .. احساس بالقهر .. بنت ماشية في امان مابتفكرش في شخص قذر ينتهك حرمتها ويمد ايده عليها .. احساس بالقهر انك مش قادرة تصرخي ولا تغضبي مش قادرة تجيبي حقك .. عارف احساس انك اتظلمت ادام كل الناس او حتى لو لوحدك ومش قادر ولا عارف ترجع حقك .. رساله .. انا اختك ماتمدش ايدك عليا .. انا اختك والدنيا دايرة رسالة .. ماتسيبيش حقك عبري عن قهرك .. امنعيه يكررها مع غيرك خليه عبره وحافظي على اختك ونفسك بعدين رسالة.. ساعدني انا اختك .. ماتعملش نفسك مش شايف .. لو في ايدك تساعدني وساكت الدنيا دايرة وهتحصل لأختك وماحدش هيساعدها رسالة ... لا للتحرش ...

حزين وهتعيش في الدور ؟!

حزين وهتعيش في الدور ؟! لما حد يقولك انا زعلان او انا متضايق بلاش الردود التقليدية.. خلي إجابتك المرة دي سؤال ... عاوز تبقى كويس وتخرج نفسك من الحزن دا ولا تعيش في الدور وتقضيها ؟! .. سؤال عجيب ويمكن يستغربه بس حقيقي لازم يكون صريح مع نفسه بالاجابة عليه ... انت دلوقت عاوز تعيش في الدور وتشتكي لاصحابك وتحسسهم اد ايه انت حزين ومحتاج حد جنبك وان خلاص مش قادر تتحمل ولا عاوز تبقى كويس وفرحان وتخرج من الحالة دي بأسرع وقت ؟!! .. لو الاختيار الاول فأستمر زي ما انت كدا وهتأخد دور البطوله في الحزن والنكد .. لكن .. لكن لو عاوز تبقى فرحان الحلول ادامك ومش هتحتاج فيها لمساعدة اي حد .. اي حد مهما يكن هو ايه بالنسبة لك .. قوم صلي ياخي صلي وادعي ربنا صلي صلاة قضاء الحاجة بنية الفرج... قراءة القرآن .. وياسلام لو سورة يوسف بجد راااحةة .. وكمان دعوة من قلبك وانت مؤمن بإلاجابة.. لو ربنا مش فرح قلبك وقتها روح دور على حد يساعدك ... ودا طبعا مستحييل .
.

كل حاجة بتحصل و ليها سبب .. بس ياترى تعرفه ولا لأ ؟!! ..

كل حاجة بتحصل و ليها سبب .. بس ياترى تعرفه ولا لأ ؟!! .. يعني صاحبك اتأخر عليك وانت متفق معاه على ميعاد ومشدد عليه ردك هيكون اية ؟!... دا عيل اصلا ..انا غلطان اني استنيته .. استهتر بيا وماحترمنيش ..طيب مش يمكن يكون حصلت معاه حاجة واتأخر بسببها دا بدل ماتتطمن عليه !! .. لو صاحبتك قالتلك انها مش مذاكرة ومش حلت كويس وفي الاخر جابت تقدير !! هيكون ردك ايه ؟! .. دي اصلا كدابة بتضحك عليا وتشيلني همها وفي الاخر بتنجح اهي وبتجيب تقدير .. مش يكون دا تعويض من ربنا عن حاجة تانية ؟! .. مش يمكن فعلا مش حلت وجات معاها نعمة من ربنا .. دا بدل ماتفرحي لها من قلبك ؟! .. لو صاحبتك بتشكيلك من حد معين وانها متصايقه ولما دخل عليكم اتكلمت كويس ولقتيها عادي خالص .. ردك هيكون ايه ؟! دي منافقه اصلا في الضهر حاجة.وفي الوش حاجة !! ليه ماتقوليش انها قلبها ابيض بتصفى بسرعه .. ليه ماتقوليش ان عندها ذوق وان مش بتعرف تعامل حد مش كويس حتى لو زعلانه منه ؟ !! دا بدل ماتفرحي انها خلاص صفيت من ناحيته ؟! لو حد من اهلك بيمنعك تعمل غلطة واكتشفت انه بيعملها .. هيكون ردك ايه ؟ دا عايش دور الوصي عليا .. اتأمرون الناس بالبر وتنسون انفسكم ؟! ..خليه يشوف نفسه .. مش يمكن هو جرب اذى الغلط دا وخايف عليك منه .. مش يمكن اتورط بزيادة.ومش عارف ينقذ نفسه فبيلحقك قبل ماتقع .. دا بدل ماتدعيله ربنا يصرف عنه ؟! . الف حاجة بتحصل معانا الف موقف مع الف شخص بس غلطان اووي اللي يفسرها من وجهه نظره ومش يحط نفسه مكان الشخص التاني .. التمس العذر لكل الناس علشان وقت غلطك او ذلتك او تقصيرك تلاقي اللي يعذرك

مظاهر جميله .. بس متأكد انها حقيقية ؟!!

مظاهر جميله .. بس متأكد انها حقيقية ؟!! كلنا بننخدع بالمظاهر.. يمكن لفترة وجيزة او يمكن على طول .. ماحدش فينا مش بيكون الانطباع الاول لمجرد الشكل او الهيئة ..ابسط دليل حبنا للقمر مع انه شوية صخور هو مجرد مراية بتعكس ضوء ساقط عليها .. صخرة وآسرة عيننا بمجرد النظر .. تقريبا هي طبيعه في الانسان بس لازم يكون في جوانب تانية يحدد منها الشخصية مش مجرد منظر من بره وفي الباطن عتمة وسواد ناس كتير شكلها بسيطة ملامحها غلبانه لكن من جوة من اطهر القلوب .. في ناس من بره ماحصلتش ومن جوة بردو ماحصلتش بس ماحصلتش في القسوة وسواد القلب .. دور على الشخصية .. دور على اسلوب التعامل ..دور على التصرف في لحظات الغضب .. دور على الشكر في لحظة السعادة ... دور على الف الف حاجة تفهمك انت بتتعامل مع مين .. بلاش سطحية .. بإختصار .. ﻋﻦ ﺃﺑﻲ ﻫﺮﻳﺮﺓ ﺭﺿﻲ ﺍﻟﻠﻪ ﻋﻨﻪ ان رسول الله صلى الله عليه وسلم قال : "ﺇﻥ ﺍﻟﻠﻪ ﻻ‌ ﻳﻨﻈﺮ ﺇﻟﻰ ﺃﺟﺴﺎﻣﻜﻢ، ﻭﻻ‌ ﺇﻟﻰ ﺻﻮﺭﻛﻢ، ﻭﻟﻜﻦ ﻳﻨﻈﺮ ﺇﻟﻰ ﻗﻠﻮﺑﻜﻢ" .. ها .. هتحكم بمجرد النظر !! ..

الارادة مهمة بس فكرك ينفع تتخلى عنها ؟! ..

الارادة مهمة بس فكرك ينفع تتخلى عنها ؟! ..

لو جيت تنام هتقفل النور وتنام طبيعي .. لكن لو الكهربا قطعت ؟! هتضايق وتحس بخنقة ويمكن ماتعرفش تنام ...

لو قررت تذاكر هتقفل النت عادي خالص وتبدأ .. لكن لو الشبكة مش تمام ممكن تتشقلب والحوار دا يقلب لك مزاجك ..

في حاجات ممكن نعملها عادي و نفس الحاجات دي ممكن نكرهها وتخنقنا .. مع ان كدا كدا بنعملها عادي ..

لكن لو جه مرة الزام في شئ ايجابي هتقاوم وتمانع ؟! .. طيب دا هو شئ ايجابي يعني ليه فايدة مؤكدة .. ليه تقف في طريق تغيير للأفضل لمجرد ان اتفرض مع انك عارف كويس ان الالزام هو الحل الوحيد لبعض المواضيع ؟! ..

الفرق انك لما بتعملها بإرادتك بتكون راضي عنها لكن لو غصب عنك ..طبعاا كل المفروض مرفوض ..

يمكن مش هتبدأ فيه بإرادتك لكن لو صح بلاش مقاومة .. وفي النهاية الحق أحق أن يتبع ...

ليه مقاومة الحق ؟! .. ليه معاندة الايجابيات مع ان لو الموضوع اتعرض اختياري يمكن تكون من اكبر الداعمين ليه .. فكر واعقلها ..

لو سمحتوا ممكن طلب ؟!..

لو سمحتوا ممكن طلب ؟!.. لو شوفتيها لابسة بنطلون او لبس مش تمام بلاش تشتميها .. دعوة منك بظهر الغيب ممكن تبدل حياتها ولكى بالمثل لو شفتيها لابسة خمار او نقاب بلاش تتكلمي انه قناع وانهم مش اهل ليه اصلا ع فكرة ممكن تدعيلهم بالثبات وحتى لو لسة مش التزمو بيه بردو ادعيلهم بالهدايه بلاش نغلط ونلوم على بعض احنا بس بدعوة ممكن نغير كتير انا اختك ماتشتمنيش لو انتي احسن مني ادعيلي لو انا جتلي فرصة الهدايه قبلك ماتشككيش فيا ادعيلي بالثبات #دعوة_عن_شتيمة_تفرق

- 18 خاص جدا للبنات ... يمكن تغير حاجة

- 18 خاص جدا للبنات ... يمكن تغير حاجة في بنات لسه في سن 14 او 15 سنة والكلام دا غالبا ليهم ... انتي دلوقت في بداية حياتك كبنوتة .. احاسيس .. مشاعر .. احتياجك لشخص يحتويكي .. مع اقل مشكلة هتحسي بحاجتك لشخص معاكي .. هتلاقي بنات كتير جدا حواليكي بتحب وتتحب .. هتلاقي ولاد كتير نفسهم يتعرفوا عليكي ويتقربوا منك .. نصيحة من حد مر بنفس المرحلة احب اقولك خليكي ملكة في زمن كتر فيه الجواري .. خليكي انتي البنت اللي البنات تحسدك على عفتك حتى لو بينت عكس دا .. خليكي البنت اللي يتقال عنها عمرها ماكلمت ولد... خليكي البنت اللي اي ام تتمناكي كبنت ليها او حتى زوجة لابنها .. خليكي انتي الصح اتمسكي بعفافك وحيائك .. خليكي انتي البنت اللي اول شاب بحياتها هو جوزها .. صدقيني هتحسي بفرحة .. فرحة اول حاجة في كل حاجة لما تكون مع حلالك مش شخص مستهتر هيرخصك وفي الاخر مش هيثق فيكي .. ببساطة انتي ماصونتيش ثقة اهلك علشان تصونيه لما تكوني في بيته ... انتي ربنا كرمك وقال عنك نص الدين ..بس لما تكوني صالحة ..انا مش عاوزاكي بنت مودرن وبتكلم وبتصاحب تقابل وتخرج انا عاوزاكي متخلفة .. خليكي متخلفة عن البنات الرخيصة وخليكي انتي الاغلى .. خليكي متخلفة عن الجهل بالدين وبالمبادئ والقيم .. خليكي متخلفة عن الغلط .. لو انتي عرفتي تتخطي المرحلة دي .. لو عرفتي تصوني نفسك .. لو بالفعل عديتها صدقيني هتحترمي نفسك اوي بعدين وكل البنات دي هتحس بالندم بس لسه لينا كلام معاهم بردو عفي نفسك والحقيها من البداية خليكي ملكة في الحلال احسن كتير من جارية رخصت نفسها اعزمي على العفة وربنا هيساندك #شير_ماتوقيفهاش_عندك

في عز الخنقة هتلاقي دايما الفرحه بتخبط ع باب قلبك بس مستنياك تفتح

عارف في عز الخنقه ‏‎   هتلاقي دايما الفرحه بتخبط ع باب قلبك ‏‎   بس مستنياك تفتح ..
هتلاقي ميت حاجه بتحاول تسرق من شفايفك بسمة ‏‎ بس انت فتح عينك وبص حواليك ‏‎  ..
هتشوف بسمة براءة في عيون طفل تنسيك الدنيا ‏‎ ‎‏  .. هتشوف نظرة رضا في عيون والدتك تعرفك انك احسن من ناس كتير ‏‎ ‏   ... هتشوف فكر حاير في عيون باباك يخليك تعرف ان ليك ضهر وسند ..ماتشيلش الهم لسه دورك جاي ‏‎ ‏‎  .. هتشوف في وسط المطر واللبخة بنت رافعه وشها للسما بتتحرك شفايفها بدعوه متخبيه ‏‎    ‏‎ ... في وسط دوشه الشارع ناس نازله بتسترزق .. في كل حاجه الف حاجة تحيي فيك امل بس انت دور ع السعادة.. ‏‎ اعطي نفسك فرصه تشوف السعادة في كل اللي حواليها ... ‏‎  افرح دا انت احلى منك مرتين ببسمة حاضنة ملامحك ‏‎ 
ربنا يفرح قلبك